Чăваш Республикин, Раççей Федерацийĕн, СССР халăх артистки, Раççей халăхĕн чапне тата сумне тивĕçнĕ Чǎваш хĕрарăмĕ, сцена Амăшĕ, чăваш театрĕн чысĕ. Миçе пин куракана савăнтарнă, кулянтарнă, шухăша янǎ вǎл. Халĕ те çаплах.
« Манăн пурнăçăм – театр»,  - тет Вера Кузьминична Кузьмина. Шăпах унта, Чăваш патшалăх академи театрĕнче, иртнĕ унăн пурнăçĕ, юратнă ĕçĕ. Çак уйăхра унăн –юбилей. Çут тĕнчене килнĕренпе 95 çул çитнине уявлать пирĕн юратнă çыннăмăр. Çулĕпе унта çитнĕ пулин те чунĕ-кăмăлĕ çамрăк-ха, вăй-халĕ çирĕп. Çакна вăл халĕ те театр сцени çинчен кайманни те çирĕплетет.Сцена çинче 70 çул хушши вăй хурса 100 ытла роль калăпланă Вера Кузьминична. Артисткăн пурнăçĕпе, пултарулăхĕпе тĕплĕнрех паллашма шутларĕç театра  кăмăллакан  вĕренекенсем. Чÿк уйăхĕн 20-мĕшĕнче 11-мĕш класра вĕренекенсем Вера Кузьмина пирки çĕннине нумай пĕлчĕç. Ялти вулавăш ĕçченĕ Савинова О.Н. сцена ǎсти çинчен кăсăклǎ та витĕмлĕ каласа пачĕ. Хǎйĕн калаçăвне вǎл мультимедиа презентацийĕпе пуянлатрĕ. Ольга Николаевна артистка пурнăçĕнчи чылай интереслĕ самантсем çинче чарăнса тǎчĕ, ун çинчен çырнă кĕнекесемпе паллашарчĕ.
Ачасем вара паллă артист çинчен çырнă сăвăсене вуларĕç. Чăваш çĕрĕнче çавăн пек пуян ăс-хакăллă, пултаруллǎ театр ĕçченĕ пурришĕн пирĕн мухтанмалла та савăнмалла – çапла пĕтĕмлетÿ турĕç вĕренекенсем. Апла пулсан, чăвашсен паллǎ поэчĕ Г.Айхи калашле ,«ун хĕн-тертне сума суса тăнлар…сăмахсǎр пуç таяр».

ФОТО